ભારતીય ક્રિકેટ ટીમનો બૅટ્સમૅન અને ગુજરાત લાયન્સનો કૅપ્ટન સુરેશ રૈનાને ત્યાં લક્ષ્મીજીની પધરામણી થઈ છે તેમ જ તેનું નામ ગ્રેસિયા રાખવામાં આવ્યું છે એવી જાણકારી ખુદ સુરેશ રૈનાએ જ આપી હતી. સાથોસાથ તેણે પોતાની દીકરી અને પત્નીના ફોટોગ્રાફ પણ સોશ્યલ નેટવર્કિંગ સાઇટ ટ્વિટર પર અપલોડ કર્યા હતા. અગાઉ સોશ્યલ મીડિયાએ શનિવારે જ તેને પપ્પા બનાવી દીધો હતો તેમ જ દીકરીનું નામ શ્રેયાંસી રાખ્યું હોવાનું પણ જાહેર કરી દીધું હતું. પરિણામે રૈનાએ આ મામલે ટ્વીટ કરીને હજી રાહ જોઈ રહ્યો હોવાનું ટ્વીટ કર્યું હતું, પરંતુ તેણે વધુ રાહ જોવી પડી નહોતી. ગઈ કાલે સાંજે જ રૈનાની પત્ની પ્રિયંકાએ બાળકીને જન્મ આપ્યો હતો.