International

હવે સ્માર્ટવોચ કરશે તમારી કારપાર્કિંગ, કેવી રીતે જાણવા કરો ક્લિક

મલ્ટિસ્ટોરમાં કારપાર્કિંગ ક્યાં કરી છે તે યાદ રાખવું માથાના દુઃખાવા જેવું કામ છે, પરંતુ ટૂંક સમયમાં તમારે દાદરા ચડીને દરેક માળ પર તમારી કાર શોધવા આંટાફેરા કરવા નહીં પડે. વિશ્વમાં ખ્યાતનામ કારઉત્પાદક કંપની બીએમડબ્લ્યૂએ એવી ટેક્નોલોજી વિકસાવી છે જેના દ્વારા એક બટન દબાવવાથી કાર આપોઆપ પાર્ક થઇ જશે અને તમારી પાસે પાછી પણ આવી જશે. જીપીએસને સ્થાને આ ટેક્નોલોજીમાં ચાર લેસર સ્કેનરનો ઉપયોગ કરાયો છે, જે નેવિગેશન માટે બિલ્ડિંગનો વર્ચ્યુઅલ મેપ તૈયાર કરે છે.

ઉલ્લેખનીય છે કે કારપાર્કિંગ ખાતે પહોંચ્યા પછી ચાલકે તેના હાથમાં પહેરેલી સ્માર્ટવોચ જ એક્ટિવેટ કરવાની રહેશે, ત્યારબાદ કાર જાતે જ કારપાર્કિંગની યોગ્ય જગ્યા શોધી કાઢી જાતે ડ્રાઇવ થઇ પાર્ક થઇ જશે. રસ્તામાં આવતા તમામ અવરોધો અને આડીઅવળી પાર્ક કરેલી કારની પણ જાતે જ કાળજી લેશે. જોકે કારઉત્પાદકોએ એવી સ્પષ્ટતા નથી કરી કે ન્યૂયોર્ક અને લંડનના વ્યસ્ત કારપાર્કિંગ જેવાં સ્થળોએ ખાલી જગ્યા ન મળે તો કાર શું કરશે. બીએમડબ્લ્યુ ક્યારે તેની કારમાં આ ફીચરનો સમાવેશ કરશે તેની પણ સ્પષ્ટતા કરાઇ નથી.


હાલમાં રિમોટ વોલેટ કારપાર્કિંગ આસિસ્ટન્ટ નામની નવી ટેક્નોલોજીનું બીએમડબ્લ્યુની આઇથ્રી મોડલની કારમાં પરીક્ષણ ચાલી રહ્યું છે જ્યારે કારમાલિક કે ડ્રાઇવર તેના હાથમાં પહેરેલી સ્માર્ટવોચ દ્વારા કારને કમાન્ડ આપશે ત્યારે તે પાર્ક થયેલી જગ્યાએથી આપોઆપ કારપાર્કિંગનાં એક્ઝિટ દ્વાર સુધી આવી પહોંચશે, તે દરમિયાન કારચાલક કારપાર્કિંગના એક્ઝિટ સુધી પહોંચી જશે. આ ટેક્નોલોજી સમયની ગણતરી પણ કરે છે. આ ટેક્નોલોજીમાં 360 ડિગ્રી કોલિઝન એવોઇડન્સ ફીચર પણ સમાવવામાં આવ્યું છે, જે કારની ચારે તરફ આવતાં કોલમો, દીવાલો અને આડીઅવળી પાર્ક થયેલી કાર જેવા અવરોધોને લેસર સ્કેનરની મદદથી પારખીને કારને ટકરાતી બચાવશે, જો સિસ્ટમ સામે અચાનક કોઇ અવરોધ આવશે તો કારમાં અચાનક બ્રેક વાગી જશે.

Source By : Sandesh

Releated Events